Bakıda Asiya Ombudsmanlar Assosiasiyası və İslam Əməkdaşlıq Təşkilatı Ombudsmanlar Assosiasiyasının iclasları keçirilib

Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyevanın təşəbbüsü əsasında ölkəmizdə Asiya Ombudsmanlar Assosiasiyası (AOA) və İslam Əməkdaşlıq Təşkilatı Ombudsmanlar Assosiasiyasının (İƏT OA) iclasları keçirilib.

Oktyabrın 18-də Bakıda AOA İdarə Heyətinin növbəti iclası keçirilib. İclasda Azərbaycanla yanaşı, Yaponiya, İndoneziya, Honq-Konq, İran, Pakistan, Türkiyədən olan ombudsmanlar və insan hüquqları təsisatlarının rəhbərləri iştirak ediblər. İclasın açılışında Pakistan Federal Ombudsmanı Ejaz Ahmed Qureşi, Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva və AOA icraçı katibi Abdul Moiz Buxari çıxış ediblər.

S.Əliyeva çıxışı zamanı Azərbaycan Ombudsman təsisatının 20 illiyi ərəfəsində ölkəmizdə xarici ombudsmanların toplantısına ev sahibliyi etməkdən məmnun olduğunu bildirib. Çıxış zamanı insan hüquqlarının müxtəlif sahələri ilə əlaqədar işçi qruplarının yaradılması təklif edilib.

İclasda AOA-nın İstanbul şəhərində keçirilmiş sonuncu iclasından sonrakı dövr ərzində həyata keçirilmiş fəaliyyəti təhlil edilib, qarşıda duran vəzifələr müəyyənləşdirilib.

Ölkəmiz bu gün həmçinin İƏT Ombudsmanlar Assosiasiyasının (İƏT OA) ümumi yığıncağına ev sahibliyi edib.

İƏT OA-nın iclasında Azərbaycanla yanaşı, Türkiyə, Pakistan, Mərakeş, İran, İndoneziyadan nümayəndələr iştirak ediblər. Sudan Ombudsmanı isə tədbirə videokonfrans formatında qoşulub.

Əvvəlcə İƏT OA prezidenti, Türkiyənin Baş Ombudsmanı Şərəf Malkoç açılış nitqi ilə çıxış edib.

Daha sonra Azərbaycan Ombudsmanı Səbinə Əliyeva qonaqları salamlayaraq, təsisat tərəfindən görülmüş işlər barədə məlumat verib və İƏT OA-nın fəaliyyətinin təkmilləşdirilməsi ilə bağlı təkliflərini səsləndirib. Ombudsman çıxışında həmkar qurumlar arasında təcrübə mübadiləsi aparılması məqsədilə təlimlərin təşkil olunmasının əhəmiyyətinə toxunub.

İclas çərçivəsində ombudsmanlar müsbət təcrübələrini paylaşaraq, assosiasiya çərçivəsində birgə əməkdaşlığın inkişafına dair fikir mübadiləsi aparıblar. İclasda həmçinin İƏT OA üzvləri arasında qurumun gələcək fəaliyyət istiqamətləri və təşkilati məsələlərlə bağlı fikir mübadiləsi aparılıb.