Ombudsman Aparatında Beynəlxalq Qızıl Xaç Komitəsinin Azərbaycandakı nümayəndəliyinin rəhbəri ilə görüş keçirilmişdir

Azərbaycan Respublikasının İnsan Hüquqları üzrə Müvəkkili Elmira Süleymanova Beynəlxalq Qızıl Xaç Komitəsinin (BQXK) Azərbaycan nümayəndəliyinin rəhbəri Elena Ajmone Sesseranı qəbul etmişdir. Görüşdə Nümayəndəliyin Müdafiə İşləri üzrə Koordinatoru Byorn Oliver Rahm və İctimaiyyətlə əlaqələr şöbəsinin müdiri İlahə Hüseynova da iştirak etmişdir. 

Qonaqları salamlayan Müvəkkil onlara Ombudsman təsisatının fəaliyyəti, müxtəlif əhali qruplarının, həmçinin girov və ya əsir götürülmüş şəxslərin hüquqlarının müdafiəsi istiqamətində görülən işlər haqqında ətraflı məlumat vermişdir. Ermənistanın Azərbaycana 25 ildən artıq müddətdə hərbi təcavüzünün davam etməsi, əsir və girov soydaşlarımızın, o cümlədən Azərbaycanın işğal altında olan Kəlbəcər rayonunda yaxınlarının məzarlarını ziyarət etmək üçün doğma yurdlarına getdikləri zaman Ermənistan Silahlı Qüvvələri tərəfindən girov götürülən Dilqəm Əsgərov və Şahbaz Quliyevin qaytarılmaması, dünya ictimaiyyətinin bu qeyri-hüquqi, qeyri-insani hadisəyə hələ də susqunluqla yanaşdığının beynəlxalq hüquq normalarına uyğun olmaması ilə bağlı narahatlığını ifadə etmişdir. 

Müvəkkil D.Əsgərov və Ş.Quliyevin məsələsini ilk vaxtlardan diqqətdə saxladığını bildirmiş, onların girovluqda olduqları müddətdə  işgəncə və ya insan ləyaqətini alçaldan rəftar və ya cəzaya məruz qalmamaları, onlarla beynəlxalq hüquqi normalara uyğun davranışın təmin edilməsində yardımçı olmaq üçün BQXK-nın Azərbaycandakı nümayəndəliyinin keçmiş rəhbəri Denis Durana müraciət ünvanladığını, Komitənin Cenevrə şəhərində yerləşən baş iqamətgahında bu qurumun vitse-prezidenti xanım Kristina Börli ilə müzakirə etdiyini, həmçinin girovların ailə üzvləri ilə görüşdüyünü vurğulamışdır.

Müvəkkil cəbhə bölgəsində baş verən hadisələr, təmas xəttində Ermənistan silahlı qüvvələri tərəfindən mülki azərbaycanlı əhalisinin, o cümlədən uşaqların və qadınların ağır artilleriyadan və iriçaplı silahlardan atəşə tutularaq öldürülməsi və ağır yaralanması, erməni hərbçiləri tərəfindən mülki və sosial obyektlərin atəşə tutulması və dağıdılması haqqında danışmışdır. Ermənilər tərəfindən Azərbaycanın  mülki əhalisini atəşə tutulması faktının beynəlxalq sənədlərə zidd olması, beynəlxalq qurumların nəticəsiz fəaliyyətinin və hərəkətsizliyinin cəzasızlıq mühiti yaratdığı və münaqişənin həllinə yardımçı olmadığı diqqətə çatdırılmışdır. Qeyd edilmişdir ki, 2017-ci ilin iyul ayının 4-də Azərbaycan Respublikasının Füzuli rayonunun Alxanlı kəndində yaşayış məntəqələrinin bir daha atəşə tutularaq 1967-ci il təvəllüdlü Sahibə Allahverdiyevanın, onun 2 yaşlı nəvəsi Zəhra Quliyevanın qətlə yetirilməsi, 2017-ci ilin avqust ayının 7-də Tovuz rayonu ərazisində 13 yaşlı Raminin ağır yaralanması ilə bağlı Müvəkkilin Bəyanatları çoxsaylı nüfuzlu beynəlxalq təşkilatlara və xarici ombudsmanlara göndərilmişdir.

Eyni zamanda Müvəkkil Azərbaycanda bu gün çoxsaylı erməni əsilli insanların yaşadığını, onların hüquqlarının da təmin edildiyini diqqətə çatdırmışdır. 

BMT İnsan Hüquqları üzrə Ali Komissarlığı tərəfindən qəbul edilən Həqiqətə çatım hüququ üzrə insan hüquqları qətnaməsinin müvafiq müddəalarına diqqət çəkən Müvəkkil, sənəddə cəzasızlığa son qoyulması və insan hüquqlarının müdafiəsi və təbliği işinə tövhə vermək üçün həqiqətə çatım hüququna hörmətin və onun təmin edilməsinin əhəmiyyətinin xüsusi olaraq vurğulandığını qeyd etmişdir.

Elena Ajmone Sessera BQXK-nın Azərbaycan nümayəndəliyinin fəaliyyəti, xüsusilə sərhədboyu rayonlarda həyata keçirilən layihələr, icmalarla aparılan iş barədə məlumat vermiş, həmçinin D.Əsgərov və Ş.Quliyevin vəziyyətlərini daim diqqət mərkəzində saxladıqlarını, ailələri ilə müntəzəm əlaqələrin yaradılmasına nail olduqlarını bildirmişdir. 

Görüşdə qonağın BQXK-nın fəaliyyəti barədə Ombudsman təsisatında, həmçinin Azərbaycan Uşaqdan-Uşağa Sülh Şəbəkəsində tədbirlərin keçirilməsi ilə bağlı təklifi, eyni zamanda qaldırdığı digər məsələlər müzakirə olunmuş, çoxsaylı sualları cavablandırılmışdır.

Sonda Elena Ajmone Sessera Müvəkkilə səmimi qəbul, açıq və ətraflı fikir mübadiləsinə görə təşəkkürünü bildirmişdir.