Ombudsman təsisatı və BMT QAK arasında 2017-ci ilin sonunadək əməkdaşlığa dair Anlaşma Memorandumu imzalanmışdır

Azərbaycan Respublikasının İnsan Hüquqları üzrə Müvəkkili (Ombudsman) təsisatı ilə BMT-nin Qaçqınlar üzrə Ali Komissarlığı (BMT QAK) zorakılıq əleyhinə mübarizə üzrə 2016-cı ildən əməkdaşlıq edir və görülmüş işlər nəticəsində müsbət təcrübə əldə edilmişdir. Qeyd olunanlar nəzərə alınaraq, bu istiqamətdə əməkdaşlığın davam etdirilməsi qərara alınmışdır.

13 fevral 2017-ci il tarixdə Ombudsman Elmira Süleymanova BMT QAK-ın Azərbaycandakı nümayəndəliyinin rəhbəri Furio De Angelis ilə keçirdiyi görüş çərçivəsində 2017-ci ilin sonunadək əməkdaşlığa dair Anlaşma Memorandumu imzalanmışdır. 

Memorandumun məqsədi “Didərginlik situasiyalarında qadınların səlahiyyətləndirilməsi” layihəsinin davam etdirilməsi vasitəsilə Azərbaycanda gender bərabərliyinin və qadınların səlahiyyətləndirilməsinin təşviqinə yönələn əlaqəli səylərə dəstək verməkdir. Sənəddə bir sıra yeni fəaliyyət istiqamətləri müəyyənləşdirilmişdir.

Görüşdə Müvəkkil BMT QAK ilə Ombudsman təsisatı arasında qaçqın və məcburi köçkünlərin hüquqlarının müdafiəsi istiqamətində qurulan sıx əməkdaşlıq əlaqələrindən, bu sahədə Ombudsman təsisatının, həmçinin Ombudsmanın Gəncə, Şəki, Quba və Cəlilabad regional mərkəzlərinin fəaliyyətindən bəhs etmiş, qanunvericilik bazası və görülən tədbirlər haqqında geniş məlumat vermişdir.

Müvəkkil gələn il Azərbaycanın BMT-nin Universal Dövri İcmal, BMT-nin  İqtisadi, Sosial və Mədəni hüquqlar haqqında Beynəlxaq Pakt, Uşaq Hüquqları Konvensiyası və “Bütün əməkçi miqrantların və onların ailə üzvlərinin hüquqlarının qorunması haqqında” Konvensiya üzrə müvafiq saziş qurumlarına  hesabatını təqdim edəcəyini bildirmişdir. O, vurğulamışdır ki, Ombudsman təsisatı sözügedən komitələrə paralel hesabatları hazırlayaraq təqdim edəcək. Bu istiqamətdə yerli QHT-ləri də cəlb etməklə geniş maarifləndirmə tədbirlərinin və fikir mübadiləsinin keçirilməsi məqsədəmüvafiq hesab edilmişdir.

Digər mühüm istiqamətlər kimi məhz Dayanıqlı İnkişaf Məqsədləri üzrə əhalinin təhsil səviyyəsinin yüksəldilməsi, gender bərabərliyinin, habelə uşaq hüquqlarının təşviq və təmin olunması ilə bağlı geniş maarifləndirmə tədbirlərinin keçirilməsi qeyd edilmişdir. Bu istiqamətdə birgə tədbirlərin təşkil olunması, habelə həmin tədbirlərin səmərəliliyini daha da artırmaq üçün müvafiq nəşrlərin hazırlanması və çap edilməsi üzrə razılıq əldə edilmişdir.

Furio De Angelis BMT QAK-ın fəaliyyətinin yeni prioritetləri, həyata keçirilən layihələr haqqında məlumat vermiş, həmçinin təmsil etdiyi təşkilatla Ombudsman təsisatı arasında əməkdaşlığı və bu illər ərzində əldə olunan uğurları müsbət qiymətləndirmişdir.

Sonda qarşılıqlı maraq doğuran məsələlər üzrə də fikir mübadiləsi aparılmışdır.